Krismas Khawhar

Krismas tuk ani a. Zing ni chhuak chu a eng mawi kher mai. Tuk dang zawng aiin an mawi ni hialin ahriata. Mitin mai chu an hmel atang ringawt pawhin an hlim tih ahriata. An thawmhnaw thar ber ber te nen chuan khawlaiah an leng suau suau a. In tinah Krismas hla mawi tak tak an Play dup dup bawka. Kawnga kal chung pawhin in zawmzata ngaihthlak tur a awm a ni. Ni e,Krismas ani miau alawm le.

Chutihlai mek chuan ram hla takah,a hnam pui tumah awm lohna ah,arilru chhungrila thu awm leh a suangtuahna te,a lunglenna leh khawharna te zawng zawng ngaihtuah pui miah lo leh hriatthiam pui hlek lo te bulah chuan khaw har leh lungleng em emin Nula pakhat,Thari chu a awm meka.

Thari chu Nula te lam hret,hmeltha pangngai leh ngaihno bei ru riaute hi ani a. A naupan lai ațang renga mi nungchang mawi leh fel em em a ni. A nu leh pate leh Zirtirtute thu a awih theiin a zah thei hle a. Naupangte pawh a ngaina in a chhawnchhaih peiha. Chungte avang chuan mite'n an ngaina em em thin a ni. Tunah hian Pathian rawngbawlin ram dangah,hnam dang karah a awm mek a ni.

Zingah chuan a mutna atangin a tho chhuaka. A hmaite aphih zawh chuan,Krismas anih avangin tih tur a awm lem lo bawka. Pawnah chuan chhuakin thing țhutthleng awn bim bem,ni dangah pawh alo țhut hahchawlh fo tawhna țhin-ah chuan a țhu a. A ngawi vang vanga. Arilru-ah erawh chuan sawi tur a ngah hle. Sawi tur ngah hle mah se,hrilh tur an awm si lo. Sawi chak tak tak ngah em em chunga ngaithlatu tur neih leh si loh hreawm dan chu ahre chiang ta khawp mai. A sam,a enkawl țhat loh avanga khawro leh thur bem tawh chu thli fim chuan a chhem pheleng der dera. Chutah,a mittui chu abiangah alo luang thla ngiai ngiai bawka. Rin thiam harsa hle mahse,an khaw lam ni awm bera arin lam chu ahawia. A mitthla-ah chuan,an in leh lo midangte tana ropui lua lo ni mahse,thinlung taka alo chenna thin te leh a chhungte,a țhiante...adt" chu an lo lang uai uaia. A sir velah chuan Sava te chu hlim tak takin an in chhaih nawk nawka. An ri chelchula. Chutah..a in ring hman lo,a țap chhuak ta ringawt mai a ni.

A ngaihtuahna chu a kal ding hle mai. Tunah te hian an khua-ah chuan mite chu hlim takin Krismas an hmang anga...keilah chu hetah khawhar takin ka awm si a-tihte a ngaihtuaha. A mitthla-ah te chuan an naupan laia a țhiante nen hlim taka Krismas an hman laite,a chhungte nen  inkhawm tura an kal dem dem laite leh ruai an țheh laite chu chiang em emin an rawn lang leha. Insum harsa ati hle. Arilru chhungrilte hriatthiam puia a sawi chakte sawi chhuah bawrh na tur awm se a duh em em a ni. Mahni inkhawngaihna a nei mai dawn niin a hre ta hiala. Chuvang chuan a mah leh a mah a in fuih sauh sauh ta zawka.

Tuna hetianga a awm nachhan hi Pathian rawng abawl vang tih ahriaa. Helai hmuna akal dawn pawh khan nuamchen tur leh ropuina uma kal ani lo tih ahre chiang hle a. Hreawm tam tak tuar huama kal anih zia te chu a in hrilh thar leh mawlh mawlha. A tana tuartu leh amah ngei pawh chhandamtu Lal Isua krista lam a en chuan,ani tawrhte chu nep ati hle a. Isua tana tuar theia a awm ve te chu alawm ta hial zawk a ni. Tin,Krismas (Krista Ruai)dik tak chu kan thinlungah Nausen Isua pian tir hi ani tihte a ngaihtuaha. Tichuan,Lawmthu sawina te,chakna te dila țawngțai tur chuan a Pindan-ah a lut taa.

(*** He thu ziak tlawm tak hi ka țhiannu te reuhte Lalnithari Ralte,tuna Kerala-a rawngbawla awm mek tana ka ziak a nih hi. Kumin Krismas arawn haw thei dawn si lova. A Masi kawr atan ka ti...😂😂😂